Dag van de Grunneger Taol op het web

Bert Hadders: Grensganger

Ik bin wat t Grunnegs/Grunnings aanbelangt aiglieks n grensgeval, want ik kom van Twijde Mond en dat ligt vanzulf in Drenthe. Ik heb doar tot mien achttiende touholden.

Dien passie is popmeziek. Wat betaikende dat veur die tounstoe in Twijde Mond woondest?
Ik denk, dat was veur mie n inkiekje in n aandere wereld. Vrouger as pa en moe soavends wel ais weg mozzen, kwam der bie ons n oppaas van n joar of zestien en dij har singeltjes van de Beatles, de Stones en Sam the Sham & the Pharaohs mit Wooly bully bie zuk. t Geluud dat doar ofkwam was uut n aandere wereld en dat fascineerde mie vot heveg.

Toun wastoe touheurder, mor wanneer bist zulf mit meziek aan loop goan?
Ik was al n puber, mor k wos nog nait recht hou k t aanpakken zol. Ik docht aiglieks, dat kin nait, want der was bie ons op t drp gainent te vinden dij t ook dee. Harst wel van dij bruloftsorkessies, mor dat was nait de richten dij ik wol. Aaltied dij accordeon, elektrisch rgel en drummer. Ik wol rock en roll mezieken doar heurde n elekrische gitaar bie, mor k har doarveur de vingers te dik, dus k bin eerst mor drummer worden. Der was bie ons in de Mond gain cultuur van bandjes. En in de Stad har je toun al Herman Brood en Phoney and the Hardcore, dus ik docht, ik mout doarveur noar Stad. Dat was veur mie as ofst vlakbie Memphis woonst, bie Elvis. Dat was Stad veur mie, want doar gebeurde tja aalmoal.

Doe bist al n beste zet as muzikant in de weer en ook hail veulziedeg.
Joa, Ik bin nogal gaauw verveeld en perbaar groag wat nijs en mag ook groag dingen onderzuiken, vandoar dat k nogal mit uutainlopende projecten aan loop bin. Vanof t begun schreef ik mien teksten zulf, want ik bin nait zo van de covers, en dat was aanvankelk wel in t Engels. Mien eerste laidje in t Grunnegs was ‘Piepen liggen plat’. d Aanlaaiden was min of meer n opdracht van Radio Noord. Dij wollen n laidje hebben over t platgooien van de vief piepen van de Hunzecentroale. En krigst din votdoalek kritiek over of t ook goud Grunnegs is en din hje wel ais dat d'oldere generoatsie der n hail aigen mainen over het, want wat wie proaten klinkt heur wat vrumd in d'oren. n Levende toal veraandert aalgedureg en dat is in t Grunnegs denk ik net zo, doar til k zulf din ook nait zo zwoar aan. Noa mien eersteling bin k in t Engels verdergoan. Om aan de gang te blieven mit t schrieven van nije laidjes bin k begonnen mit de songclub in Caf Marleen in Stad. Der wordt doar vrij regelmoateg n meziekoavend holden, woarbie je allent mor mitdoun kinnen as je mit wat nijs op proppen kommen en dat het hail wat muzikanten der tou zet om regelmoateg n nij laidje te schrieven. Deur de joaren hn het dat hail wat moois opleverd. Aiglieks bin k goud op weg kommen mit t schrieven in t Grunnegs deur t initiatief van stichten Nij. Doarveur schreef ik bievubbeld de laidjes ‘Volluk’ over deurwoarders en ’De Bode van het licht’ over louche biebelverkopers. Bie t schrieven van dizze laidjes kwam k der achter dat k ter in t Grunnegs veul meer inleggen kin as in t Engels en dat t qua beeld aalmoal veul beter klopt.

In t ofgelopen veurjoar verscheen van die dien debuutalbum Bert Hadders en de Nozems ‘Over de badde’.
Joa, dij heb k opnomen mit de Nozems. Dij bestoan uut: Johan Viswat, Wyno Bruinsma (ex-Luie Hond) en Dim Junius (ex-IOS). Ik heb dij ploade moakt om wat veur d'aiweghaid vaste te leggen en ook om mit aandere muzikanten wat omhaands te hebben. t Grunnegs is veur mie nog aal n verboale cultuur en as je t nait op ain of aander menaar vaste leggen, din het ter aine over tien, twinteg joar gain wait meer van. Zai de laidjes op dizze spaigelploat mor as t vasteleggen van overleverns van distied.
terug naar Bert Hadders

Deze pagina is bijgewerkt op