TOAL EN TAIKEN
TIEDSCHRIFT VEUR GRUNNEGER KULTUUR
17e Joargang nummer 1, jan. / feb. 1999
Toal en taiken op het web
NIJE OETGAVEN
"Strunen deur Grunnen'. 1998 MM 037, f 34,95.
n Spaigelploatie mit nummers van diverse artiesten en orkesten.
De opnoamen veur dit Ploatje binnen moakt in Sing Sing Studio in Metslawier, Radio Noord in Grunnen, Studio Alex Staal in Veendam, Studio Spitsbergen in Zuudbrouk en in t Kielzog op t Hoogezaand. De techniek, zangopnoames en mixages binnen van: Milan Ciric, Renger Koning, Radio Noord, Alex Staal, Coos Grevelink en Ejo Dreise. As vocalisten hebben mitwaarkt: Lianne Abeln, Agnes Roozeboom, Sijtse Scheeringa, de Askay Brothers, Sandra Schooneveld, Erwin de Vries, Eltje Doddema, Alex Vissering, Fransien Kuiper en Alje van Bolhuis.
Onze Grunneger zangeressen en zangers onder aandern begelaaid deur het 'Haydn Jeugd Strijkorkest', de 'Eemsmond Bigband', het 'Strijkkwartet NNO' en de Chr. Brassband 'Elad'.
t Is n moal hail wat aans, mor doarom nait minder mooi. Benoam Henny Maring mit zien arrangementen en zien Eemsmond Bigband binnen op dit ploatie, zoas dat hait: 'prominent aanwezig'. Dat steurt mie traauwens niks, want ik mag dat wel geern heuren en de arrangementen dij Henny moakt het geven aan n bestoand laid op dizze menaaier n hail aandere dimensie. Zo is t leste nummer ('Genoat') instrumenroal en dut, zo speuld, veurvast nait onder veur n raszuvere Zuud-Amerikoanse rumba.
Ook de aandere nummers mit het Haydn jeugd Strijkorkest en de brassband Elad klinken in dit jaske hail aans en as jet mie vroagen soms alderdeegs mooier as de oorspronkelke oetgoave. Zo dut de begelaaiden van 'Mien Eerappellaand' sikkom wat klassiek aan en n poar moal de overgang noar n aandere toonsoort is veur dit nummer beslist n aanwinst. Ede haar dit wizze wel goud vonden. Ook 'Cadillac' swingt mit de ondersteunen van de Eemsmond Bigband de pot oet.
t Ploatje hait 'Strunen deur Grunnen' en wat dat aangaait haren der van mie nog wel wat meer vocoale artiesten op stoan kind, mor meugelk komt der nog n moal n vervolg op.
Dat kin hail best, want ik duur dit spaigelploatje waarm aanbevelen aan elk dij van goie Grunneger meziek holdt.Hink Uil