ARBEID ADELT

Graatje waor veertieën en góng nao 't febrik
Hae wou 'ne bankwirker waere
Op sjoeël haw de meister 'm altied gezag
Met vlijt maakt men slechts carrière
Dus góng hae mit iever metein aan de sjlaag
en baorde per daag doezend gater
En es 'm dat sóms waal de sjtraot èns oet hong
dan dach hae mer ummer aan later
Want heel hae dat vol vief en twintjig jaor lank
kreeg hae ein horloge mit kètting es dank

Want arbeid dae adelt, dat is toch ein feit
Dien bótterham verdeens te mit ieërlike zjweit
En ouch in de biebel dao zaet de profeet
Op wirke rös zaege, op voeligheid neet
En ouch ziene pap sjikde zich in dat lot
Haw gemaord wie ein paerd, haw gein rös in zien vot
In de vreze des Here waor hae eine sjlaaf
en dat zag ouch pestjoer wie hae sjtong aan zien graaf

Nao veeftieën jaor sjófte keek Graatje èns óm
hae veulde zich ech neet bedraoge
Want wat men häöm vreuger altied haw gezag
dao waor toch gein waord van gelaoge
Hae waor noe al ploogbaas van 17 man
die baorde veur häöm noe de gater
Haw ein vrouw en veer poete, ein hoes en ein geit
eine goudvèsj, tv en 'ne kater
En baorde hae nog mer tieën jaor aan dees bank
kreeg hae ein horloge mit kètting es dank

Want arbeid dae adelt, dat is toch ein feit
Dien bótterham verdeens te mit ieërlike zjweit
En ouch in de biebel dao zaet de profeet
Op wirke rös zaege, op voeligheid neet
En ouch ziene pap sjikde zich in dat lot
Haw gemaord wie ein paerd, haw gein rös in zien vot
In de vreze des Here waor hae eine sjlaaf
en dat zag ouch pestjoer wie hae sjtong aan zien graaf

Zo maorde oos Graatje zien jaore aan ein
en kaom tot ein sjoeën jubileum
Mit ein hoeëgmès plus praeke es dank veur zien werk
en 't koer zong: Laudamus Te Deum
En op de receptie haet d'n directeur
d'n iever van Graatje gepreze
en häöm tot veurbeeld van väöle gesjteld
mit zien rösteloos sjófte en peze
Dus kreeg hae ein kruukske mit pittige drank
en ouch dat horloge mit kètting es dank.

Tekst en muziek: HERMAN VEUGELERS

Van de lp "Saneringsroute" (1975)

naar Herman Veugelers

Deze pagina is bijgewerkt op