NEHALENNIA

Zeeuwsche Vereeniging voor Dialectonderzoek

DE LESTE DIALECTDAG VAN DE EEUW

Roos Manderveld-van Veen

De 16e oktober was 't weer zover. Ons jaarlijkse uutstapje naar Kapelle, waar de koffie stond te wachten. Natuurlijk waeren de bolussen, of zo as ze bie ons zeggen de drollen, weer zo vers da ze smolten in je mond. De opkomst was weer zo as van ouds groot, zo'n dikke tweehonderd vuuftig mensen waeren gekommen en dan ek nog nie de mensen geteld die voor ons zouen gaan zingen en zo.

Deze keer ben me maar vuuf minuten te laete begonnen, dus da viel nog al mee. Ik moe we even zeggen mensen, ik è nooit leren schrieven in mijn eigen dialect, dus ik schrief maer zo ak 't zeg. Daor moe je maor nie te veej op letten. Afijn, de voorzitter vertelt nog eens even wie dat er allemael in 't bestuur zitten, voor a me da nog niet wisten. In de vergaoderinge gaet 't altied over de notulen van vorig jaer, de aftrejende bestuurslejen en vooral de vriewilligers die staan te trappelen om in 't bestuur te mogen kommen. (grapje). Al mee al, de ledenadministratie is ok weer ergens onder gebrocht en wè bie mien zei de dek. Alleen mien naom dat schient nog a 'n probleem te wezen. Manderveld-van Veen. Je mot is weten wa of ze dae allemaol van maeken. Tot Mansfeld toe. Maor allee, ik doe ut graag en noe èk tog 't idee dak vanuut Loon op Zand, toch nog een beetje bie judder hoor.
Meneer De Regt briengt verslag uut over de voortgang van de werkzaomheden van de stichting 'De Zeeuwse Taele'. Ut gae goed. Me zien a tot an de letter M gekomme en van de Provincie èn wudder genoeg geld gekreege om de klus af te maoken. Alleen noe is Marco Evenhuis der mee gestopt en mot er weer iemand anders gezocht worre om der mee door te gaon. Da zou toch wè wa makkeleker zien.
De lezing door de streektaalconsulent de heer Gerrit Kraa (das toch mooi 'Ollans niewaor) van 't Van Deinse Instituut in Enschede, die leit piekfijn ons uut oe of ze daarboven mee het dialect omgaon. Da klinkt toch allemael wè prachtig. Ut schoonste van alles von ik zien vondst van de naam Computer-post, afgekort als Compost voor E-mail berichten, je weet wè da bin die berichten die ze via de computer naor mekaore toe sturen. Moek judder is zegge waarom ze da zo doen?
Luuster; ze zeggen dat da veel vlugger gaet en das natuurlek ok wè waor. Maar weet je waorom ze da eigenlek doe? Dan moeten ze tenminste nie nae aol da 'geleuter en gezeur' an de telefoon te luusteren en dan ok nog net doe of ze 't echt interessant vinnen. Noe weten judder oe of da zit.
Maor even serieus, die Gerrit Kraa die èt ut goed voor mekaore daor in Overijssel. En die è ok nog geliek at um zeit dat je gebruuk moe maoken van kruuwaogens. Die zien der tenslotte nie voor niks.

Nao meneer Kraa kregen we een mooi verhaoltje van ons verenigingslid Mevr. D. Schipper-Vaarzon Morel, de dochter van W. Vaarzon Morel. Das toch wè ne sjieke naom of nie soms! Ze vertelde ons zo 'n beetje de levensgeschiedenis van der vaoder en oe da ze in ons mooie zeeuwse land terecht gekominen binne. Ze deed da eel leutig. En 't verhaol da ze vertelde, da was ok eel schoon.

Noe ist tied vor meziek. Onze eigen Anja Kopmels zong eur schoone liedjes en we mochten nog meezingen ok. Zo als elk jaor waoren 't weer mooie dingen om te 'oren.

Tied voor de drank, allee aperetiefje, en dan de lunch van de zeeuwse taefel. Je kon geliek nog is even kieken bij de boekenstand of ter nog wa voor je bie lag. De keus wordt toch elk jaor weer groter dus ok moeileker. De bediening en ut eten waren weer zo as gebruuklek uutstekend, mee aol die stroopvet, krupjes spek, poskop, enz..

Om twee uur ben me weer begonnen. En da begon geliek weer mee muziek. 'Kant ooi' (kweet we niet wat betekent, maar 't klinkt goed) van Schouwen. Da was toch wè een groepje mensen da mooie dingen kon zingen van vroeger, maar ok zeien ze da geld winnen in de loterij toch ok nie alles is. Bluuf maar gewoon dan doe je a gek genoeg. Ok zeiden ze da ter straks alleen ma dialekten overbluuven en 'Ollans binnen de EEG nie meer bestaot.

Toen kwam koffie en thee om de droge kelen te smeren. Want van luusteren krieg je net zo veej dorst as van meezingen.

Na de koffie en thee kwam Piet Scheerders uut Hulst. Judder weten wè, das die vent van Ambras en noe bliekt da ok nog nun eele serieuze man. Da wist ik nie, maar judder misschien wel. Die kwam ons vertellen oe da ze 't dialect weer op de scholen terug aant briengen zien. Da verhaol zat goed in mekaor, maor toen die 't ons wou laoten 'oren, ging er toch wa mis mee de techniek. Jao mensen, dan moek toch wè een beetje lachen, want die a net vertelt dat die onderwiezers op die scholen toch wè een knopje van een cd-speler in konden duwen. Maor ik heb um toch zelf me naor da apparatuur toe zien lopen, dus ik dienk da um dat zelf ok nog nie kan.
Da geeft niet oor Piet, me geloven je ok wè op je woord en wudder zullen moeten mee helpen om te zorgen dat onze kinders en hun kinders, toch nog dialect bluuve spreken. Want bie onze zuuderburen in Belgie, zien de mensen toch ok tweetaolig, dus waorom bie ons nie.

Engel Reinhoudt mag weer de middag afsluuten. Die è noe wel gevraogd om 's morgens te mogen optrejen, dan kan um ok is vroeger naar huus. Ik dienke dat da geen goed idee is, want dan moeten we wel al zien opmerkingen missen die tie den hele dag èt ehoord.

De dag wordt besloten mee ons Zeeuwse Volkslied en sinds lange tied kunnen die van de overkant ok weer es meezingen, want we stoppen optied om den boot te kunnen 'aolen.
Mensen, 't was weer leutig en ik hoop dat judder der de volgende eeuw ok weer bie zullen zien.
Dag hoor.


Deze pagina is bijgewerkt op